Barcelona feston këtë të premte, më 29 nëntor 2024, 125-vjetorin e themelimit të saj. Për këtë rast të veçantë, në Katalunjë do të mbahet një gala dhe Lionel Messi ka shfrytëzuar mundësinë për të uruar klubin.
“Para së gjithash, urime për 125 vitet. Jam krenar që jam pjesë e këtij klubi, që jam një tifoz i Barcelonës. Kam pasur fatin që Zoti më solli në këtë vend dhe më bëri të kaloj gjithë jetën time në këtë klub të mrekullueshëm,” tha Messi në një intervistë për programin ‘Nou Clam’ në ‘3Cat’, duke shtuar se është shumë i lumtur që po e sheh skuadrën të rikthehen në nivelet më të larta.
“Një klub i veçantë, i ndryshëm nga të tjerët, me gjithë vështirësitë që ka sot për të qenë një klub ndryshe për shkak të mënyrës si menaxhohet futbolli dhe ndryshimeve që kanë ndodhur. Fakti që sot ekipi i parë përfaqësohet ashtu siç dëshirojmë dhe siç na pëlqen është një arsye e madhe krenarie,” shpjegoi ai, duke treguar se i mungon çdo gjë nga Barcelona.
“Më mungon klubi, qyteti, njerëzit, dashuria… dhe, si gjithmonë, shpresoj që të vazhdojmë të kemi rezultate të mira dhe ta bëjmë këtë klub edhe më të madh,” përfundoi Messi.
Gazeta Eurogoli është portal sportiv me qëllim të informimit me lajmet e fundit nga futbolli ndërkombëtar. Për çdo pyetje apo arsye kontakti mos hezitoni të na shkruani në email: kontakt@gazetaeurogoli.com