Këto janë 5 rastet kur AC Milan u dëmtua rëndë nga referët, vihet në pikëpyetje Scudetto

Goli i barazimit nga Destiny Udogie kundër Milanit dje ishte shembulli më i fundit kur ndaj kuqezinjve bëhen padrejtësi nga gjyqtarët.

Mbrojtësi i Udineses shënoi golin e barazimit në minutën e 66-të të ndeshjes së djeshme të Serisë A në Stadio Giuseppe Meazza me dorë, por kjo nuk u pa as nga arbitri dhe as nga VAR-i, duke i lënë kuqezinjtë të zemëruar në fund të ndeshjes. Frustruese për Stefano Piolin, kjo nuk ishte hera e parë që Milani vuan nga një vendim i dobët.

Në humbjen 1-0 ndaj Napolit në dhjetor, goli i barazimit të Franck Kessie u anulua pas një kontrolli në VAR, me gjyqtarin fillimisht duke dhënë golin përpara se të vendoste që Olivier Giroud kishte ndërhyrë në lojë nga një pozicion jashtë loje, pavarësisht se ishte shtrirë në tokë.

Një tjetër incident ndodhi në humbjen 2-1 të kuqezinjve ndaj Spezias muajin e kaluar; Goli i Junior Messias nuk u pranua pasi arbitri kishte fishkëllyer për një faull ndaj Ante Rebic vetëm pak çaste para se topi të hidhej në rrjetë. Ai kërkoi falje për gabimin më vonë, por kjo do të thoshte pak për anën e Piolit.

Në tetor, Theo Hernandez u përjashtua me karton të kuq gjatë fitores 2-1 ndaj Romës, duke e detyruar atë të humbasë derbin kundër Interit. Kartoni i parë i verdhë ishte vendimi i duhur, por i dyti ishte pak i diskutueshëm, sidomos duke pasur parasysh se vetëm pak çaste më parë pati një faull të dukshëm nga Rade Krunic në mesfushë, i cili nuk u ndal.

Më në fund, është penalltia e dhënë për Hellas Verona në fitoren 3-2 në tetor. Ka pasur një përplasje mes Alessio Romagnolit dhe Nikola Kalinic në buzë të zonës së rreptësisë dhe Giallobluve iu akordua një penallti, pavarësisht se video më vonë zbuloi se kroati në fakt kishte faulluar kundër mbrojtësit italian.