Perez ia tregon derën, erdhi me shumë bujë por do të largohet pa u mbajtur mend për asgjë

Luka Jovic nuk ka ndërmend të presë më gjatë për një mundësi që të tregojë vlerat e tij në Madrid. Sulmuesi serb duket se ka vendosur të largohet nga Los Blancos në verë dhe klubi nuk do ta pengojë.

Ndryshe nga Gareth Bale, megjithatë, Jovic ka një kontratë deri në vitin 2025 dhe duhet të gjejë një blerës. Jovic u transferua te Real Madrid në 2019-ën nga Eintracht Frankfurt, por nuk ka arritur të përshtatet në Bernabeu duke mos bindur as Zidane dhe as Ancelotti-n.

Gjatë tre sezoneve në klub, me gjashtë muaj të kaluar në huazim te Frankfurt, sulmuesi ka luajtur 49 ndeshje në të cilat ka arritur të shënojë vetëm 3 gola. Nga ana tjetër duhet thënë se ai ka luajtur mesatarisht 30 minuta për çdo ndeshje, siç ka shpjeguar edhe Diario AS.

Pasi e ka blerë për 60 milionë euro, Real Madrid do të duhet ta shesë për të paktën 30 milionë euro për të mbuluar shpenzimet e pjesës së mbetur nga kontrata e tij. Nëse nuk do të arrijnë të gjejnë një blerës, Los Blancos do të kërkojnë ta huazojnë.